من حكايات جدو عكاشة

جلبة وضوضاء قادمة نحوي وبالكاد أراها..

جدو عكاشة واجي ..جدو عكاشة واجي..

أحفادي مسكوا بيدي وبعصاتي ويقولون..

إحكي لنا حكاية جديدة ياجدو ..

إيش من حكاية دلا دلا بي باتسقطوني الأرض وأنا عجوز ما أقدر أمشي إلا على عصاتي.

إحكي لنا حكاية العريس والعروسة..

أيش من عريس وأيش من عروسة ذكروني أنا يا عيالي أنسى بسرعة..

العريس الإنتقالي والعروسة الشرعية..

هاه ذكرت والخاطبة السعودية..
طيب إجلسوا..

كان زمان قبل خمسين عام كان رجل قوي إسمه الإنتقالي وأرملة مطلقة إسمها الشرعية ..
الإنتقالي معه أولاد أيتام أمهم ماتت..
والشرعية عقيمة بدون أولاد طلقها زوجها المؤتمر الشعبي ورمى بها في الشارع..
والشرعية جالسة تتسكع بتدور على عمل ومحد رضي يشغلها ولا أحد رضي يعطيها قرص روتي..
ذات مرة لقيتها الخاطبة السعودية وقالت لها..

عندي لش راجل قوي با أخليه يتزوجش مرته ماتت ومعه أولاد وهو بيدور حد يربيهم له..

لا أني خلاص تبت ماعاد أشتي أتزوج كفاية إلي عمل بي زوجي الأول المؤتمر الشعبي جالس يتحكم بي ويهينني ويعايرني لإنّي عقيمة..

لا ياهبلا الإنتقالي ثاني مابا يعايرش ولش عليا أقنعة ويخليك ملكة داخل البيت وأنت تتحكمين بالبيت والمصاريف إلى يدش..

صحيح المصاريف بيدي وأني المتحكمة وايش اللي يضمن لي..

قد نحن نعمله شرط في العقد إن كل شي بيدش وإذا تفرعن عليش يخرج من البيت ويسلمه لش ..

وافقت الشرعية واقتنع الإنتقالي على مضض لإنه مامعه من يربي له عياله الأيتام..

عقدوا وكتبوا الشروط ووقع عليها الإنتقالي..
ومن حين ما استلمت الشرعية البيت راحت تعذب عياله بقطع المصروف وإطفاء الكهرباء..
حتى الماء قطعته كلما أرادوا العيال يتغسلوا مالقوش ماء..

يابه حرام عليك جاعانين مانأكلش إلا من نص قرص روتي يابس..

ياعيالي خالتكم هي المسئولة عن المصاريف..

يابه حرام عليك خالتنا تتطفي علينا الكهرباء وتقطع الماء..
خالتنا تعذبنا ..يرضيك هذا..؟

أنا با أكلمها وياويلها با أطلقها لو طلع كلامكم صحيح..

الإنتقالي راح لزوجته الشرعية وهو غاضب..

هكذا تعذبي عيالي ماشي اتفقنا على هذا ..
إتفقنا إن المصروف وكل أمور البيت بيدش..

من قالك ياحبيبي..؟

عيالي هم اللي أشتكوا منش..

راحت تبكي..
أني هكذا عذبني زوجي الأول المؤتمر وعياله وذلحين عيالك يعذبوني بيعايروني إنّي عقيمة ومامعي أولاد حرام عليكم كلكم عليا وعادهم يكذبوا عليا..

خلاص ياحبيبتي خلاص إمسحي دموعك وبا أروح لهم الآن وبا أضربهم ضرب وياويلهم..

راح الإنتقالي من عندها وابتسمت وهي فرحانة واتصلت بالخاطبة السعودية..وقالت لها..

الراجل يحبني موت ومايقدر يستغني عني وأني با أعذب له عياله وبا أقطع المصروف وبا اطفي الكهربا وبا اقطع الماء..

قد قلت لش أني با أخليه طوع أمرش وما يقدر يطلقش لإن البيت بايروح عليه حسب الشرط..

زاد صراخ العيال من شدة التجويع وقطع الكهرباء والماء ..
وعادها كمان راحت تحن على عيال زوجها الأول المؤتمر الشعبي ودخلتهم بيت زوجها الجديد الإنتقالي..

الإنتقالي قرح قلبه ..
إتصل بالخاطبة السعودية..

كله أنتي السبب بتعذب عيالي وعادها كمان جابت لي عيال زوجها الأول المؤتمر يزاحموا عيالي في البيت خلاص أنا با أطلقها وبا أطرد عيال زوجها الأول..

أنت مجنون نسيت الشرط اللي في العقد كل شي بيدها حتى البيت باتخرج منه ونرميك في الشارع ويصبح البيت بيتها..

بلع الإنتقالي ريقه وتنهد تنهيدة كبيرة من الألم والمقلب اللي سببته له الخاطبة السعودية..

توقفت عن الحديث وتنهدت تنهيدة عميقه..
سمعوني الأحفاد..وقالوا..

مالك ياجدو خلصت الحكاية..

لا ما خلصت ولكنها تجمدت وما فيش أي جديد الوضع كما هو..

طيب وفينهم الآن الأنتقالي والشرعية..

في دار العجزة عيال الشرعية وعيال الخاطبة السعودية دخلوهم دار العجزة..

وفين عيال الإنتقالي ياجدو..

إلا هذه خلوها لوقتها وبا أخبركم فين هم..

طيب ياجدوا وفين الخاطبة السعودية ..

تحتضر على السرير ماقدرت تخرج النسمة من كثر بلاويها وفتنها..

طيب وفين زوج الشرعية الأول المؤتمر الشعبي..

في مستشفى المجانين…

وتوتة توتة باقي للحدوتة فصل عادها ماحصل..